Жүзиў: бассейнде шуғылланыў арқалы денемиз кѳринисин дүзеймиз
Жүзиў бул денедеги майларды жоқ етиўде дерлик ҳәмме ушын ең жақсы усыл. Әлбетте, гәп дәрья яки бассейндеги әдеттеги шомылыў ҳаққында емес, ал жүзиў бойынша мақсетли шуғылланыўлар ҳаққында болады. Бул калорияларды нәтийжели түрде жоқ қылыўға жәрдем береди. Келиң, жүзиў саған қалайынша салмағыңды кемейтиўге ҳәм келешекте саламат болып ер жетиўиңе жәрдем беретуғынлығын кѳрип шығамыз.
Артықша салмақтан қутылыў ушын қалайынша жүзиў керек?
- Ўақыттың ѳтиўи менен тезирек ҳәм интенсив түрде жүзиў керек.
Жүзиў менен шуғылланып баслаған дәслепки ўақытта кѳп муғдарда калория жумсалады. Бирақ, кѳнликпелериң артқан сайын, жүзиў ўақтында жүрек соғыўының жийилиги оншели дәрежеде аспайды. Бундай жағдайда жүрек соғыўының жийилигин сақлап турыў ушын еле де қаттырақ ҳәм тезирек жүзиў керек болады. Бир айланып жүзгеннен соң, жүрегиң бир минутта қанша соққанын есаплаўың керек. Шынығыўлар ўақтында жүрек соғыўының максимал жийилигин 50%дан 70%ға шекемги аралықта сақлаўды мақсет етиў керек. 220 санынан ѳзиңниң жасыңды алып таслаў арқалы жүрек соғыўының максимал жийилигин есаплап шығыўыңа болады. Мысалы, егер сен 16 жаста болсаң, сен ушын жүрек соғыўының максимал жийилиги тѳмендегише болады: 220-16=204. Демек, шынығыўлар сен ушын жүрек соғыўының жийилиги 102-143 аралығында болыўы керек
2.Шынығыўларды тренер менен биргеликте исле.
Дурыс жүзиў техникасын үйрениў, жақсырақ ҳәм жеңил жүзиўиңе жәрдем береди.
- Ҳәптесине 3-4 мәрте жүзиў менен шуғыллан.
Артықша салмақтан қутылыў ушын физикалық жақтан актив болыўың талап етиледи. Бул жуўырыў, жүриў ҳәм жүзиў менен шуғылланыў дегенди билдиреди.
Салмақты кемейтиў ушын жүзиў менен шуғылланыў жийилиги басқа шынығыўлардың жийилиги менен бирдей. Сонлықтан, жақсы нәтийжеге ерисиў ушын ҳәптесине 4-5 күн шуғылланыўға ҳәрекет ет.
- Ең баслысы басланыўы!
Күн ара 15-20 минут жүзиўден басла, кейин барған сайын организмиңниң имканиятына қарап, ҳәптесине 4-5 күн 30 минутқа шекем асырып бар. Егер жүзиў шынығыўларын кѳп күш пенен басласаң, булшық етлердеги аўырыў ҳәм шаршаў сени тилегиңнен қайтарыўға мәжбүр қылыўы мүмкин.
- Аўқатланыў рационыңды дурыс таңла.
Салмақты кемейтиў бойынша ҳәр бир бағдарламада, қабыллаған калориядан кѳбирек калория жумсаў зәрүр. Майлы ҳәм мазалы затларды аз жеўиңди қадағалап бар. Аўқатланыў рационыңа кѳбирек белок ҳәм клетчаткаларға бай ѳнимлерди қос, сондай-ақ суўды дурыс баланыста қабылла.
Жүзиў адамнан жүдә кѳп энергия талап етеди, сонлықтан шынығыўлардан 1 саат алдын аўқатланып алыў керек. Салқын суў шынығыўлардан соң адамның иштейин бираз асырыўы мүмкин, сонлықтан шынығыўлардан соң не жеў керек екенлигине итибар қаратыў тийис.