Жас ѳспирим қашан қырынып баслаўы керек ҳәм оған қандай пәки (сақал алғыш) дурыс келеди?

Ѳспиримлик дәўирде организмде ҳәр тәреплеме ѳзгерислер жүз береди. Бул дәўирде ѳзине қалай күтим кѳрсетиў ҳәм денесин қалай күтиў кереклигин түсиндириў әҳмийетли.

Қайсы жаста қырыныўға болады?

Қырыныў ушын анық жас белгиленбеген. Қырыныўға мүтәжлик туўылған ўақыттан баслап қырыныўға болады.

Ең баслысы, оның жанында пәкиден қалай пайдаланыўды ҳәм бул қалай кешетуғынын түсиндирип беретуғын адам болыўы керек. Надурыс қырынғанда түклер қалыңласып, сапластырыўы қыйын болған асқыныўлар жүз бериўи мүмкин.

Териниң түрине қарай, қырыныўдан алдын миннетли түрде жуўыныўға арналған затлардан пайдаланыў керек. Буннан соң терини антисептик жәрдеминде тазалап, бир нешше минут даўамында түкти жумсартатуғын сүртпе жағып қойыў керек. Кейинги қәдемде крем ямаса гель жағып (бул да териниң түрине қарап таңланады), түктиң ѳсиў бағыты менен бирдей ҳалатта қырыў керек. Түктиң ѳсиў бағытына қарама-қарсы қырынғанда түклер ишке қарай ѳсиўи мүмкин. Қырынып болғаннан соң терини жыллы суў менен шайып, териниң түрине сай келетуғын қырыныўдан соң жағылатуғын кремди сүртемиз.

Жаслар ушын арнаўлы қырыныў қураллары жоқ, бирақ жас ѳспиримлер ушын териге арналған бир неше затлар бар. Әдетте, жас ѳспиримниң териси майлы, майда тесикшелерден ибарат ҳәм жүзинде таспалар бар. Мысалы, майлы тери ушын емлик қәсийетке ийе косметикалық затлардан пайдаланыўға болады. Егер тери сезимтал болса, алоэ ҳәм гиалурон кислотасынан таярланған кремлер пайда бериўи мүмкин.

Пәки (сақал алғыш) таңлағанда, адам ѳзи қалай қырынғанды унататуғынын есапқа алыўы тийис. Егер ҳеш қандай түк қалдырмай тереңнен қырынатуғын болса, онда электро-пәкини таңлағаны мақул. Егер тери сезимтал болса, қырынғанда ығаллықты тәмийинлейтуғын моделлерден пайдаланыўға болады. Пәки (сақал алғыш) модули қалай таярланғанына итибар қаратыў әҳмийетли. Егер оның алмаслары жумсақ ҳәм жүз контуры бойлап ҳәрекетленетуғын болса, бул жақсы пәки (сақал алғыш) болып саналады.