Сабақтағы бослықларды қалай толтырыўға болады?

Мектепте барлық темаларды бир ўақыттың өзинде өзлестириў қыйын болыўы мүмкин, әсиресе, олар қурамалы темалар болса. Егер сиз сабақта теманы түсинбесеңиз, бул үйге тапсырмаңызды орынлаўда қыйыншылықлар туўдырыўы мүмкин. Нәтийжеде, кейинги темаларды түсиниўиңиз қыйынырақ болады.

Ал, енди не ислеў керек?

Ең дәслеп, сабақтың ҳәр бир темасын түсиниўге ҳәрекет етиўиңиз керек. Егер бир нәрсени түсинбесеңиз, оқытыўшыға қосымша сораўлар бериң.

Екиншиден, тема турмыста қандай жағдайда қолланылатуғынлығын түсиниўге ҳәрекет етиң. Мысалы ушын, физика, химия ямаса биология ҳаққында айтсақ, қандай да бир қубылыстың турмыста қалай ислениўин түсинсеңиз, белгили бир теманы өзлестириўиңиз аңсатлаў болады.

Үшиншиден, көргизбели қураллар, қосымша мағлыўматлар, сүўрет ҳәм кестелерге қарап, сораўларыңызға жуўап табыўыңыз мүмкин.

Төртиншиден, теманы тәкирарлаў арқалы беккемлеўиңиз керек.

Бесиншиден, сабақлықтағы тема бойынша өз бетинше тапсырмаларды орынлаң, үйге тапсырманы жуўапкершиликти сезинген ҳалда орынлаң.

Егер сиз сонда да теманы түсиниў ҳәм өзлестириўде қыйналсаңыз, оқытыўшыңыздан жәрдем сораң. Ол сизге әлбетте теманы әпиўайы тил менен тусиндиреди. Өйткени, оның бул тема бойынша қосымша материаллары бар.