Эмоционаллық интеллекттиң лидерликке тәсири

Эмоционаллық интеллект (Emotional Intelligence) — бул өз сезим-туйғыларыңызды аңлаў ҳәм басқарыў, сондай-ақ, басқалардың сезим-туйғыларын түсиниў қәбилети болып есапланады. Жас лидерлер ушын усы көнликпени раўажландырыў команданы басқарыўда ҳәм нәтийжели мүнәсибетлер орнатыўда оғада керекли әҳмийетке ийе.

Mәселен, егер команда ағзаларынан бири стресс жағдайына түсип қалса, сиз оны өз ўақтында қоллап-қуўатлап, жәнжеллердиң алдын алыўыныз мүмкин. Эмоционаллық интеллект адамлар менен жақсы қарым-қатнас жасаў ҳәм қыйыншылықларды жеңип өтиўде көмек береди. Төменде бул бойынша бир неше мәсләҳәтлер берилген:

Өз-өзин түсиниўди раўажландырың.

Сезим-туйғыларыңызды түсиниў өзиңиздиң минез-қулқыңызды қадағалаўға жәрдем береди. Мәселен, егер ғәзеплениў сизге машқаланы конструктивлик додалаўға кесент берип атырғанын сезсеңиз, тәнепис алың ҳәм шешимлерди излеўге итибар қаратың. Түрли жағдайлардағы реакцияларыңызды турақлы түрде анализлеп барың.

Сезим-туйғыларыңызды басқарыўды үйрениң.

Стрессли жағдайларда қәтержамлықты сақлаў әҳмийетли болады. Мәселен, қыйын сәўбеттен алдын терең дем алыў яки релаксация техникасынан пайдаланың.

Актив тыңлаў көнликпесин әмелге асырың.

Сәўбетлесиңиздиң гәпин бөлместен тыңлаң, бул оның көз қарасын жақсы түсиниўге жәрдем береди. Мәселен, егер команда ағзасы идеялары ямаса тәшўишлери менен бөлиссе, оны толық тыңлап ҳәм кейин оны түсингениңизди анықластырың. Бул исенимди беккемлейди ҳәм сәўбетлесиўди нәтийжели етеди.

Эмпатияны пайда етиң.

Басқалардың жағдайын түсиниўге ҳәрекет етиң. Мәселен, егер биреў ўазыйпаны орынлай алмай атырған болса, буның себебин түсиниўге ҳәрекет етиң: шаршаў ма, билими жетиспеўшилиги ме, яки жеке машқалалары ма? Жәрдем бериўге таяр екенлигиңизди көрсетиң.

Пикирлесиў көнликпелерин раўажландырың.

Ҳүрмет пенен пикирлесиў келиспеўшиликлер ҳәм жәнжеллердиң қәўпин кемейттиреди. Өз пикирлериңизди сондай баян етиўге ҳәрекет етиң, олар сизди дурыс түсинсин. Мәселен, критика орнына шешимге итибар қаратың: “Бул бөлимди жақсылаў ушын биргеликте қандай илажлар көриўимиз мүмкинлиги ҳаққында ойласайық.” Критикалаў менен сәўбетти басламаң ҳәм жеке мәселелерге өтпең.

Унамлы орталық жаратың.

Команда ағзаларын қоллап-қуўатлаң ҳәм олардың жетискенликлерин хошаметлең. Мәселен, жақсы нәтийже ушын мақтаң яки команданың жыйналысында ҳәммени өз үлесин қосыўға шақырың. Бундай орталық мотивация ҳәм нәтийжели шерикликти хошаметлейди.

Эмоционаллық интеллектти раўажландырыў арқалы сиз тек исенимли лидер емес, бәлким командаңызды қоллап-қуўатлап, илҳамландыра алатуғын шахсқа айланасыз. Усы көнликпелер қыйыншылықларды жеңиўде, исенимли мүнәсибетлер орнатыўда ҳәм нәтийжели жумыс орталығын жаратыўда жәрдем береди.