Emlashdan keyin bolani qanday parvarishlash kerak?

Ba’zi chaqaloqlar emlashdan keyin haddan tashqari bezovtalanishi mumkin, hatto uxlashda muammolar bo’lishi mumkin. Farzandingiz bilan ko’proq vaqt o’tkazishingiz uchun kun oxiriga hech narsa rejalashtirmang.

Bolangizga ichishi uchun tez-tez suyuqlik berib turing. Ayrim bolalar emlashdan keyin 24 soat davomida kamroq ovqat eyishi odatiy hol hisoblanadi.

Emlashdan so’ng, bir necha kun davomida bolaning yoki emizikli onaning ratsioniga yangi ovqatlar kiritilmasligi kerak.

Haroratning ko’tarilishi tananing emlashga nisbatan normal reaktsiyasi bo’lib, immunitet tizimi immunitetni rivojlantira boshlaydi. Bolaning isitmasi yuqori bo’lsa, isitmani pasaytiradigan dorilarni qabul qilish borasida shifokor bilan maslahatlashing.

Farzandingizga bir necha kun davomida alohida e’tiborli bo’ling. Vaktsinalar, dorilar kabi, gohida yon ta’sirga olib kelishi mumkin – haroratning biroz oshishi, ukol joyi atrofida shish va qizarish, kabi. Bu odatiy holat. Agar biron bir alomatlar sizni tashvishlantirsa, shifokorga murojaat eting.