Bemorning OIV holati haqidagi ma’lumotlar konfidentsial (maxfiy) hisoblanadimi?

18 yoshdan oshgan shaxslarning OIV maqomi toʻgʻrisidagi ma’lumotlar toʻliq maxfiy hisoblanadi va tibbiyot xodimlari bu ma’lumotni bemorning ruxsatisiz hech kimga (qarindoshlari, hamkasblari, doʻstlariga) oshkor qilishga haqli emas. Natijalarni faqat test topshirgan shaxsning oʻzi olishi mumkin. Mutaxassislar bu haqda telefon, pochta yoki boshqa aloqa vositalari orqali xabar berishga haqli emas. Shuningdek, OITS markazlari natija toʻgʻrisidagi ma’lumotni boshqa mutaxassislarga zaruratsiz berish huquqiga ega emas. Agar lozim topilsa, bemor bilan ushbu ma’lumotni boshqa mutaxassisga oshkor qilishni kelishib olish kerak.

LEKIN:

● Tibbiyot muassasalariga tashrif buyurgan bemor oʻz maqomi toʻgʻrisida tibbiyot xodimlariga xabar berishi talab qilinadi.

● Agar u turmush qurmoqchi boʻlsa va tekshiruv natijalari ijobiy boʻlsa, bemor kelin/kuyovga kasallik haqida xabar berishga majbur. Bundan tashqari, bemorning ota-onasi xabardor boʻlishi juda muhim boʻlgani uchun bemorning ota-onasi va kelin/kuyovning ota-onalari keyingi qadamlarni hal qilish uchun chaqiriladi.

● Ijobiy holati haqidagi ma’lumotni jinsiy sherikka oshkor qilish talab qilinadi. Agar bemor bunday qilishdan bosh tortsa, “Fuqarolarning sogʻligʻini muhofaza qilish toʻgʻrisida”gi qonunga muvofiq, ushbu ma’lumotni yetkazish bemorning ishini olib boradigan epidemiologga yuklanadi.

● 0 yoshdan 14 yoshgacha boʻlgan bolalar murojaat qilishganida maslahat ularning ota-onalari va qonuniy vakillariga beriladi. Agar bola 15-18 yoshda boʻlsa, u holda bolaga maslahat ota-onasi yoki rasmiy vasiylar ishtirokida beriladi. Bu holatda, bola konsultatsiyada teng huquqli shaxs sifatida ishtirok etadi. Yosh bolalarga ularning ijobiy statusi haqida darhol xabar berilmaydi. Odatda buning uchun optimal yosh 7-11 yosh hisoblanadi. Bola psixologik tayyorgarlikning bir necha bosqichlaridan oʻtishi lozim boʻladi. Bularning barchasi ota-onalar va davolovchi shifokor bilan birgalikda hal qilinadi.

Bemorlarning sanab oʻtilgan barcha huquq va majburiyatlari Oʻzbekiston Respublikasi Sogʻliqni saqlash vazirligining 2022-yil yanvar oyida kuchga ega boʻlgan buyrugʻida mustahkamlangan.