Toʻlaqonli uyqu uchun shart-sharoit yaratish va ertalab energiyaga toʻlib uygʻonish sirlari

Sifatli uyqu – bu shunchaki dam olish emas, balki yaxshi kayfiyat, mustahkam sogʻliq va yuqori samaradorlikning asosidir. Har kuni sergʻayrat va koʻtarinki kayfiyatda uygʻonish uchun nafaqat qulay joy tanlash, balki bir nechta oddiy qoidalarga amal qilish ham muhim.

Uyqu uchun qulay shart-sharoitlarni yaratish – bu muhim qadam, lekin kundalik odatlar undan kam ahamiyatga ega emas. Muntazam kun tartibiga rioya qilish, toʻgʻri ovqatlanish tungi dam olishingizni sifatliroq va samaraliroq qiladi. Quyida toʻlaqonli uyqu uchun oddiy qoidalarni koʻrib chiqamiz.

Uyqu uchun qulay shart-sharoitlarni qanday yaratish mumkin?

Qulay shart-sharoitlar – yaxshi uyquning muhim qismi. Bunda yotoq joyingizni toʻgʻri tashkil qilish kerak:

• Qulay yotoq. Uxlaydigan joyingiz shunday qulay boʻlishi kerakki, tanangiz toʻliq dam ola olishi lozim. Juda yumshoq ham, juda qattiq ham boʻlmagani maʼqul.
• Qorongʻullik va tinchlik. Uxlash vaqtida chiroqni, telefonni va boshqa qurilmalarni oʻchirib qoʻying. Ekrandan chiqadigan koʻk nur melatonin – uhlashga yordam beradigan gormon ishlab chiqarilishiga toʻsqinlik qiladi.
• Xonani shamollatish. Yangi havo tezroq uxlashingizga va uyqu sifatiga ijobiy taʼsir koʻrsatadi.

Maslahat. Uxlashdan avval telefonni nariroqqa qoʻyib qoʻying va kitob oʻqishga yoki sokin musiqa tinglashga harakat qiling. Bu tezroq uxlashga va yaxshi dam olishga yordam beradi.

Uyqu sifatini yaxshilash uchun nimalar qilish kerak?

Uyqudan maksimal foyda olish uchun bir necha qoidalarga amal qilish zarur:

• Muntazam kun tartibi. Har kuni, hatto dam olish kunlari ham, bir vaqtda uxlashga va uygʻonishga harakat qiling. Bu organizmingizni tartibga moslashishiga yordam beradi.
• Kunduzi koʻp uxlashdan saqlaning. Kunduzi meʼyoridan ortiq uxlash tungi uyquning buzilishiga sabab boʻlishi mumkin.
• Kechki payt koʻp ovqatlanmang. Koʻp miqdordagi ovqat uyquga xalaqit berishi mumkin. Oʻzingiz yaxshi koʻrgan yogurt yoki meva bilan yengil tanavvul qilish yaxshiroq.

Maslahat: Agar uxlashga qiynalsangiz, uyqudan oldin dam olish texnikalarini, masalan, nafas olish mashqlari yoki meditatsiyani sinab koʻring. Bu organizmingizni uyquga tayyorlashga yordam beradi.

Yodda tuting, uyqungiz oʻzingizni qanday his qilishingizga, kayfiyatingizga va hatto oʻqishdagi muvaffaqiyatlaringizga bevosita taʼsir qiladi. Agar toʻyib uxlasangiz, koʻproq energiyaga ega boʻlasiz.