Menstrual siklni kuzatish: bu nima uchun muhim?

Menstrual siklni kuzatish – bu shunchaki hayz kunlarini qayd etish emas. Bu o‘z tanangizni yaxshiroq tushunish va sog‘lig‘ingizga g‘amxo‘rlik qilish usulidir. Siz maxsus ilovalarni ishlatishingiz yoki oddiy kalendar yuritishingiz mumkin. Bu sizning organizmingiz qanday ishlashini tushunishingiz va hayzga oldindan tayyorgarlik ko‘rishingizga yordam beradi.

Nima uchun siklni kuzatish muhim?

O‘z tanasini tushunish

Hayz qachon boshlanishini bilish muhim tadbirlarni, sport mashg‘ulotlarini yoki safarlarni rejalashtirishga yordam beradi. Bundan tashqari, agar siklingiz kutilmaganda qisqarib yoki uzayib ketsa, bu organizmdagi o‘zgarishlar, masalan, gormonal o‘zgarishlar bilan bog‘liq bo‘lishi mumkin. Agar siklingiz 21 kundan qisqa yoki 35 kundan uzun bo‘lib qolsa va bu bir necha marta takrorlansa, albatta shifokorga murojaat qilish tavsiya etiladi.

Muammolarni erta aniqlash

Agar hayz tartibsiz kelsa, bu gormonal o‘zgarishlar, stress yoki kasallik belgilari ham bo‘lishi mumkin. Masalan, hayz to‘xtab qolsa yoki juda og‘riqli bo‘lsa, bu haqida shifokor bilan maslahatlashish muhim. Quyidagilarga e’tibor bering:

• Muntazamlik (hayz har safar deyarli bir xil vaqtda keladimi)
• Davomiylik (necha kun davom etadi)
• Hayz xususiyatlari (qay tarzda kechadi).

Simptom (belgi)larni hisobga olish

Ba’zi qizlar hayz ko‘rishdan oldin kayfiyatlari o‘zgarib, qorinlari yoki boshlari og‘riyotganini sezadilar. Kuzatuvlar ushbu kechinmalarni siklning turli kunlari bilan qanday bog‘liqligini tushunishga yordam beradi. Shunday qilib, charchoq yoki asabiylik his qilishingiz mumkin bo‘lgan kunlarga oldindan tayyorlanish osonlashadi.

Siklni qanday kuzatish mumkin?

Bugungi kunda buning uchun ko‘plab qulay ilovalar mavjud. Ammo oddiy kalendar yuritish ham yetarli. Birinchi hayz kunini, davomiyligini va har qanday noodatiy sezgilarni qayd eting. Vaqt o‘tishi bilan sizning siklingiz to‘liq manzarasi shakllanadi.

Foydali maslahatlar:

• Oddiy narsadan boshlang: har bir hayzning birinchi kunini yozib boring
• Sikl davomiyligiga e’tibor bering (odatda 21 kundan 35 kungacha bo‘ladi)
• O‘zingizni yomon his qilishingizga sabab bo‘ladigan har qanday belgilarni qayd eting va mutaxassisga murojaat qiling.

Unutmang, muntazam sikl – bu salomatlikning yaxshi ko‘rsatkichidir!