Балаға оқыў ҳәм дем алыў ортасындағы тең салмақлылықты табыўда қандай жәрдем бериў мүмкин? Ата-аналарға баланың оқыў пайытында шаршап қалыўының алдын алыў бойынша усыныслар

Ҳәзирги жас өспиримлерден мектеп, жәмийет ҳәм шаңарақ үлкен нәтийжелерди күтеди. Бул басым стресске ҳәм руўхый саламатлықтың жаманласыўына алып келиўи мүмкин. Егер мектептеги оқыў белгили дәреже де стресс келтирип шығарып атырған болса, перзентине тең салмақлылықты табыўға, артықша жүклеме ҳәм эмоционал шаршаўдың алдын алыўға жәрдем бериў ата-аналар ушын әҳмийетли болған ўазыйпа болып табылады. Ата-аналар өз перзентлериниң оқыўы ҳәм руўхый саламатлығы (қәтержамлығы) арасындағы тең салмақлылықты табыўда жәрдем бериўи әҳмийетли, бул арқалы артықша жүк ҳәм эмоционаллық шаршаўдың алдын алыўға болады.

Mектептеги жетискенликлер менен бирге перзентиңиздиң эмоционаллық  саламатлылығының әҳмийетин тән алың. Kөплеген ата-аналар ушын перзентиниң оқыўындағы жетискенликлери биринши орында турады. Лекин, жас өспиримниң психологиялық жағдайы да усы дәрежеде әҳмийетли саналады. Оқыўдағы турақлы басым перзентиңизди шаршаў, тынышсызланыў ҳәм түскинликке алып келиўи мүмкин. Mектептеги табыслар – бул өмирдиң бир бөлими екенлигин тән алыў ҳәм руўхый саламатлықты биринши орынға қойыў оғада әҳмийетли.

Усыныс. Перзентиңиз бенен мектепте ҳәм оның сыртындағы сезим-туйғылары туўралы сәўбетлесиң. Тек ғана оның баҳалары ҳәм нәтийжелерин емес, бәлким оқыў процессинде өзиниң қаншелли қоллап-қуўатлағанын сезиниўинде талқылаң.

Дем алыўы ҳәм өзин көрсетиўи ушын имканият жаратың. Mектеп тапсырмалары ҳәм имтиханларға таярлық көриў көп ўақытты талап етеди, лекин, жас өспиримлерге дем алыў, хобби ҳәм өзин көрсетиўи ушында имканият керек. Бул спорт, музыка яки былайынша ашық ҳаўада сейил етиўи болыўы мүмкин. Қандайда бир нәрселерге қызығыў руўхый басымды түсириўге ҳәм қуўатты тиклеўге жәрдем береди, соның ушын ата-аналар перзентин қызықтырған жумыслар менен шуғылланыўына хошаметлеўлери керек.

Усыныс. Перзентиңиздиң спорт, музыка, сүўретшилик яки ашық ҳаўада ўақыт өткериў  оған заўық бағышлайтуғын искерликке ийе екенлигине исеним пайда етиң. Оқыў ҳәм дем алыў арасындағы тең салмақлылық эмоционал турақлылықты сақлаўына жәрдем береди.

Ўақытты басқарыўға үйретиң. Оқыў ҳәм дем алыў арасында ўақытты дурыс бөлистириў жас өспирим ушын әҳмийетли болған көнликпе болып табылады. Жас өспирим мектептеги көплеген тапсырмалар  ҳәм жуўапкершиликлер менен жүзлескенде, олар оған аўырлық етип, руўхый ҳәм шаршаўды асырыўы мүмкин. Бундай жағдайда ол өзин басым астында қалғандай ҳәм жуўапкершиликлер менен толып-тасқандай сезинеди. Оған тапсырмаларды орынлаў менен бирге дем алыў ҳәм де дослары ҳәм  жақын туўысқанлары менен пикирлесиў ушында ўақыт ажыратыўға жәрдем бериң.

Усыныс. Перзентиңиз бенен биргеликте оқыў тапсырмалары ҳәм дем алыў ушын ўақытты да есапқа алыўшы кесте дүзиң. Оны әҳмийетлилерин ажыратыўға ҳәм барлық жумысларды ақырғы минутларға қалдырмаўға үйретиң, бул арқалы стресстен қашыўға болады.

Эмоционал жағдайдың әҳмийети ҳаққында сәўбетлесиң. Руўхый саламатлық көбинесе оқыў жетискенлиги алдында екинши орында турады. Бирақ, жас өспирим өзиниң эмоционал жағдайын түсиниў ҳәм оған ғамқорлық етиў қаншама әҳмийетли екенлигин түсиниўи керек. Оны өз сезим –туйғыларын тән алыўға ҳәм өзине итибарсыз болмаўына үйретиң.

Усыныс. Перзентиңиз бенен руўхый саламатлық ҳаққында ашық-айдын сәўбетлесиң. Егер, ол тынышсызланыў яки түскинликти сезип атырған болса, буны додалаў яки қәнигеге мүрәжат етиўди усыныс етиң. Оның ишки жағдайына болған итибарыңыз оған өзин және де исенимли сезе алыўына жәрдем береди.

Сәтсизликлер ҳәм стресс пенен қәйтип гүресиў кереклигин үйретиң.

Жас өспиримлер көбинесе оқыўда сәтсизликлерге дус келеди ҳәм бул олардың руўхый жағдайына унамсыз тәсир етиўи мүмкин. Перзентиңизге қыйыншылықлар менен гүресиўди үйретиў ҳәм қәтелерди үлкен машқала деп есапламаў кереклигин түсиндириң. Қыйын мәўритлерде оны қоллап-қуўатлап, сәтсизликлер–бул табысқа қарай алып барыўшы жолдың бир бөлими екенлигин еслетиң.

Усыныс. Пәс баҳа яки қәтелер ушын критикалаўдың орнына, жас өспирим менен не нәрсени жақсылаў мүмкинлиги ҳаққында сәўбетлесиң. Оған сәтсизликлер – үйрениў ҳәм өсиў имканияты екенлигин көрсетиң.

Ата-ана ҳәм жасы үлкенлердиң қоллап-қуўатлаўы жас өспиримниң оқыў ҳәм руўхый жағдайы менен қалайынша гүресиўине айрықша тәсир көрсетеди. Перзентиңизге  мектеп ҳәм жеке қәтержамлық арасындағы тең салмақлылықты табыўға жәрдем бериў арқалы оның тең салмақлы болып раўажланыўына үлес қосасыз ҳәм шаршаў қәўпин кемейттиресиз.