Chempion kabi uxlang: salomatlik uchun oddiy maslahatlar (1-qism)

Siz uyqu salomatlik uchun juda muhim ekanligini bir necha bor eshitgan boʻlsangiz kerak, lekin nega bu shunday ekanligini tushunasizmi? Organizm uchun toʻlaqonli uyqu muhim! Uyqu nafaqat oʻzingizni yaxshiroq his qilishga yordam beradi, balki oʻqish va sportdagi natijalaringizni ham yaxshilaydi. Keling, uyqu nima uchun muhim va uni qanday yaxshilash mumkinligini haqida gaplashamiz.

Uyqu organizmimizga oʻzini yaxshiroq his qilishga yordam beradi

Harakat va emotsiyalarga toʻla kundan keyin organizm tiklanishi uchun 8-10 soat uxlash kerak. Agar siz koʻproq yoki kamroq uxlasangiz, oʻzingizni yomon his qilishingiz mumkin. Bu nima uchun muhim?

• Uyqu davomida organizm energiya va hujayralarni tiklaydi. Bu jismoniy tarbiya darslari yoki mashqlardan keyin tezroq tiklanishga yordam beradi.
• Uyqu gormonlar darajasini nazorat qilishga yordam beradi. Masalan, uyqu davomida oʻsish gormoni ishlab chiqariladi, u mushaklarni qoʻllab-quvvatlaydi va tana oʻsishi hamda mustahkamlanishiga yordam beradi. Bu – oʻsayotgan organizm uchun juda muhim.
• Uyqu yetishmasligi kortizol — stress gormoni darajasini oshiradi. Agar bu gormon koʻp boʻlsa, vazn ortishi va doimiy charchoq hissi paydo boʻlishi mumkin.
• Uyqusizlikda ishtaha oshishi mumkin, chunki organizm energiya yetishmasligini qoplashga intiladi. Bu ortiqcha ovqatlanish va yogʻ toʻplanishiga olib kelishi mumkin.

Maslahat. Har kuni bir vaqtda uxlashga yotishga va uygʻonishga harakat qiling, yaxshisi – 22.00 dan kech boʻlmagani maʼqul. Bu tanangizga barqaror rejimga oʻrganish yordam beradi.

Uyqu ruhiyatni barqarorlashtirishga yordam beradi

Uyqusiz tundan keyin darslarda diqqatni toʻplash yoki maʼlumotlarni eslab qolish qiyin boʻlishini payqagan boʻlsangiz kerak. Buning sababi, uyqu davomida miya kun davomida oʻrgangan barcha maʼlumotlarni qayta ishlaydi.

• Uyqu xotirani yaxshilaydi. Qanchalik koʻp uxlasangiz, yangi narsalarni shunchalik yaxshi eslaysiz.
• Yaxshi uxlaganingizda, qaror qabul qilish osonlashadi. Uyqu yetishmasligi vazifalarni hal qilish qobiliyatiga salbiy taʼsir qilishi mumkin.
• Uyqu tashvish va stressni yengishga yordam beradi. Kam uxlasangiz, yoqimsizlik va bezovtalik hissi ortadi.

Maslahat. Agar darslarda diqqatingiz pastlayapti yoki kayfiyatingiz yomonlashayotganini his qilsangiz, koʻproq uxlashga va barqaror uyqu rejimiga rioya qilishga harakat qiling. Bu miyangizning samarali ishlashiga yordam beradi.

Toʻlaqonli uyqu uchun shart-sharoit yaratish va ertalab energiyaga toʻlib uygʻonish sirlari